Emezeliñ da Unvaniezh demokratel Breizh

UDB he deus ezhomm eus holl dud youlek evit kas war-raok he soñjoù e-barzh ar gevredigezh vreizhek ha pelloc'h zoken, evit gwelet un deiz Breizh emren, ekologel ha kengret e-barzh ur Frañs kevreadel, doujus ouzh al liesseurted. Deuit ganeomp !

Lein lezenn bloaziek : e-barzh al lezenn a denn da dreuzwelusted ar vuhez foran, sammad ar skodennoù ha donezonoù roet gant un den fizikel d’ur gevredigezh aotreeet pe meur a hini evel kevredigezh arc’hantaouiñ, pe d’ur respetad arc’hantour pe meur a hini eus ur strollad politikel pe meur a hini, zo uhelaet da 7 500 € (15 000 € dre oaled kemedel). Kement-se a dalvez ne c’hall ket an holl donezonoù ha skodennoù a vez roet ganeoc’h a-hed ar bloaz d’ar strolladoù politikel a fell deoc’h skoazellañ mont en tu all da 7 500 € (15 000 € dre oaled-tailhoù). Hervez mellad 11-15 lezenn an 11 a viz Meurzh 1988 e vez kastizet an tremenadennoù gant kastizoù ha toull-bac’h. Gwareziñ ar roadennoù personel : an titouroù a gasit dimp zo ret evit merañ hoc’h emezeladurioù, ho profoù hag hon darempredoù. Miret int hepken evit implij gant Unvaniezh Demokratel Breizh (UDB) hag UDB-Sevel Arc’hant (kevredigezh arc’hantaouiñ an UDB degemeret d’an 22/09/2003).

Statudoù goude enkemmadurioù d’an 12 a viz Du 2000 :

Mellad 1 : Unvaniezh demokratel Breizh (UDB) zo ur strollad politikel a vez bodet ennañ ar Vretoned, a orin pe dre berc’hennañ, ha mignoned Breizh hag a oar ez eus eus pobl Breizh. Ober a ra an UDB evit ma vo anavezet gwirioù pobl Breizh e-barzh stad Frañs, e-barzh Unvaniezh Europa hag e-barzh an ensavadurioù etrebroadel.

Mellad 2 : Ober a ra UDB e Breizh a-bezh ha stourm a ra evit ma vo adunvanet ez‐velestradurel.

Mellad 3 : Ober a ra UDB evit ma vo savet Europa e mod ur c’hevredad ha ma vo reizh ouzh ar pobloù hag ar rannvroioù.

Mellad 4 : Ober a ra UDB evit gwirioù sevenadurel pobl Vreizh, peurgetket evit m’en devo da vat pep Breizhad·ez ar gwir da anavezout istor, sevenadur ha yezhoù Breizh.

Mellad 5 : Ober a ra UDB evit ma vo pourchaset da Vreizh ensavadurioù emren ha peadra d’he diorren.

Mellad 6 : Kondaoniñ a ra UDB nep stumm a vilaat mab‐den, peurgetket ar ouennelouriezh, ar faskouriezh hag an hollveliourezhioù a bep seurt. Ober a ra evit ma vo diazezet ur renad demokratel krenn, kement war tachenn an hiniennoù ha war an dachenn stroll.

Mellad 7 : Lec’hiañ a ra UDB hec’h obererezh politikel e‐barzh ar breutaad demokratel, en ur nac’hañ groñs ober gant doareoù feuls.

Mellad 8 : Embann a ra UDB ez eo talvoudusoc’h mab‐den hag al labour eget an arc’hant (ar c’hevala), hag ez eo ret e vefe reoliataet ha heñchet ekonomiezh ar marc’hadoù gant ar galloudoù foran ha gant oberiantiz ar geodedourien.

Mellad 9 : Embann a ra UDB e vez ar roll kentañ gant aozadurioù ar sindikadoù hag ar micherioù, ha gant ar c’hevredigezhioù, evit degas muioc’h a zemokratelezh en ekonomiezh.

Mellad 10 : Ober a ra UDB evit ma vo diazezet ur gevredigezh kengret, ar pezh a gas da ingalañ ar pinvidigezhioù etre an hiniennoù, etre ar rannvroioù hag etre ar pobloù e-barzh Europa evel e‐barzh ar bed.

Mellad 11 : Ober a ra UDB evit un diorren padus, hag a warezo amzer dazont an douar hag ar rummadoù da zont. Evit se eo ret ma vo demokrateloc’h ha kreñvoc’h ar frammoù etrebroadel, kement en Europa hag er bed.

Mellad 12 : Kengred eo UDB gant ar pobloù a stourm evit o frankiz politikel, ekonomikel ha sevenadurel.

Mellad 13 : A‐enep ar soudardaj eo UDB, hag e ra evit ma vo berzet an armoù er bed a‐bezh, da gentañ penn an armoù nukleel. Difenn a ra an dlead emellañ, dindan kontroll aozadurioù etrebroadel hag a vefe demokratel, evit ma ne vo ket gwallgaset ken gwirioù mab‐den evel ma vezont a‐vil‐vern da geñver ar brezelioù etrebroadel pe e diabarzh ar Stadoù.